ДЮРДЬОВ – По традициї, вчера, на Други дзень Крачуна по юлиянским календаре, у Културно-уметнїцким Дружтве „Тарас Шевченко” у Дюрдьове отримани Крачунски концерт.
На програми участвовали младши члени шицких секцийох КУД и народзенє Исуса Христа винчовали з колядами, рецитациями, а парняки их провадзели на рижних инструментох. На бини виведзени и кратши драмски приказ о тим як ше дакеди ходзело колядовац з вертепом.
Орґанизатор концерту було КУД „Тарас Шевченко”, а дзеци за наступ пририхтали уметнїцки руководителє з Дружтва, учительки з основней школи и воспитачка з дзецинскей заградки, котри уча дзеци на руским язику.
Сала була полна з патрачами, а по законченю програми дзеци з публики добредзечнє виходзели на бину и винчовали Крачун, як на Вилїю кед ходзели шпиваню, та и вони достали пакецик.
За тоту нагоду порихтани 60 пакецики хтори подаровани шицким учашнїком у програми, а купени су зоз средствох КУД и од спонзорох.