НОВИ САД – Пияток вечар, 7. децембра, у Новим Садзе отримани 16. Фестивал малих сценских формох „Дюра Папгаргаї” у Ґимназиї „Лаза Костич”. Шицких присутних привитал нвовибрани предсидатель НС Руснацох Борислав Сакач, а урядово Фестивал отворел длугорочни театрални дїяч Дюра Латяк.
Того року Фестивал ше отримує лєм у єдним дню. На репертоаре були два представи. Перше була виведзена дзецинска, „Вай-фай принцеза” кулского РКУД „Др Гавриїл Костельник” у режиї Нади Лендєр. Дзеци представу одбавели як кед би ше наисце на сцени лєм бавели, а пренєсли и порученє, же сучасна технїка нє шицко у живоце.
Друга представа була за старших „Жени” Студия „АРТ” Дома култури Руски Керестур у режиї Владимира Надь Ачима. Шейсц нєщешлїви животни приповедки виприповедани у першим лїцу од шейсцох женох, хтори указую на терху живота и їх нєщешлїви судьби. Керестурски млади ансамбл у добрим темпу, з интересантнима костимами и минималистичну сценоґрафию, дзе шицки реквизити мали свою функцию, упечатлїво одбавел представу, дзе єдну з тих женох одґлумел хлоп. Шицки улоги були прешвечлїво дочаровани публики.
Орґанизатор Фестивала Матка – Дружтво Руснацох Нового Саду – Войводина. Пригодни дарунки уручел предсидател УО Дружтва Владимир Гаргаї режисером Нади Лендєр и Владимирови Надь Ачимови. Модераторка вечара була Марина Хома.
Чкода же у публики нє було дзеци и же Новосадянє нє пришли у векшим чишлє.