Трибина о медийох на меншинских язикох

автор мгк
1.1k Опатрене

НОВИ САД – Прейґ явного сервису РТВ и медийних установох як цо „Руске слово”, „Мадяр со”, „Глас луду”, „Хрватска риєч” и „Либертатеа” треба предлужиц державну политику потримовки меншинскому информованю – наведзене у Студиї „Информованє на язикох националних меншинох – предлоги за нови политики, децению познєйше”, хтора вчера, 29. мая, представена у просторийох Нєзависного дружтва новинарох Войводини у Новим Садзе.

На трибини з назву „Медиї на меншинских язикох нєшка у Сербиї – кадзи далєй?” уводнїчаре були Калман Кунтич, Мирослав Кевежди и др Владимир Илич, а у  викладаню о онлайн-информованю Кевежди гварел же предносц маю тоти хтори реґистровани, бо можу конкуровац за доставанє средствох, медзитим, опитал ше и чи  интернет конєчне ришенє и чи уведзе кризу до постояцого пестованя традициї, як и чи национални совити националних меншинох маю моци за ришованє проблемох у тим швидким електронским информованю.

– Попри тим, медиї под уплївом политичних партийох, а требали би буц  ошлєбодзени од прицискох и одвичательни ґу своєй публики. У даєдних случайох мож поставиц питанє же кельо сполнюю явни интерес – гварел Кевежди.

Предлоги у представеней студиї виведзени на основи анализох и вецеймешачного теренского виглєдованя медийних змистох на 16 меншинских язикох концом 2016. року, реализованого у 24 городох и општинох у Сербиї и наменєни су злєпшаню стану у информованю на язикох националних меншинох, а источашнє то и практичне доприношенє виробку Медийней стратеґиї, предвидзеней зоз Законом о електронских медийох и з Акцийним планом за прегваряцке Поглавє 23.

3-Mediji-02

ПОВЯЗАНИ ТЕКСТИ