РУСКИ КЕРЕСТУР – Парохийни Каритас церкви св. оца Миколая у Руским Керестуре традицийно, на Вельку соботу, орґанизовал акцию збераня пасхалного єдзеня за тих цо им то потребне.
Одволали ше велї парохиянє хтори до Каритасу принєсли шицко цо потребне за вельконоцну кошарку – сирца, писанки, шунки, колбаси, пасочки, а було и колача. Пекара „Макаї” и на тот завод даровала пасочки. Капелан о. Михайло Шанта пошвецел пасхалне єдзенє хторе ше потим поодношело до трицец обисцох.
У розношеню єдзеня ґу волонтером ше уключели и млади, а першираз и виронаучни школяре 5., 6. и 7. класох хторих орґанизовала їх вироучителька, Златица Малацко.
Так и тогорочни вельконоцни швета були у духу дарованя.
