СТАРА ПАЗОВА/КУЛА – На 55. Фестивалє аматерских театралних дружтвох Войводини, хтори у Старей Пазови отримани од 19. по 27. май, абсолутни побиднїки три представи з кулскей општини – з Червинки, Кули и Крущичу.
Першу награду на Фестивалє освоєла представа Аматерского театру „Стеван Сремац” з Червинки „Малогражданска свадзба” Бертолда Брехта, у режиї Радоя Чупича, котри преглашени и за найуспишнєйшого режисера.
Другу награду освоєла представа Културного центру Кула „Трактак о служнїцох” Боґдана Чиплича, у режиї Драґана Остоїча, а трецу награду достала представа Драмского студия „Луча” КУД „Крущич” з Крущичу „Каньош Мацедонович”, по тексту Види Оґнєнович, а у режиї Деяна Цицмиловича.
Актере у побиднїцких представох достали и други награди на Фестивалє, та так ґлумец з Червинки Зоран Радулович преглашени за єдного спомедзи пейцох найлєпших на цалей покраїнскей смотри, а награди за епизодни улоги достали Ґордана Мештер и Милорад Бєлан. Єлена Салонтаї наградзена за найлєпшу хореоґрафию, а представи Червинчанох припадла и Награда „Анамария Михайлович” за найлєпши визуални дизайн.
Ґлумец Слободан Ноґавица з представи Кулянцох преглашени за єдного з найлєпших на Фестивалє, а Ґордана Мештер и у тей представи наградзена за епизодну улогу. Представа з Кули достала и награду за ориґиналну музику, автора Бояна Алексича.
Цали ансамбл представи Крущичанох наградзени за найлєпшу сценску бешеду, а Никола Булатович тиж медзи пейцома найлєпшима ґлумцами-аматерами у Войводини. Йован Паул за свою улогу у тей представи достал Похвалу.