У публикациї „Менєй числени национални меншини”, котру промововал Центер за реґионализем у Новим Садзе (опать на штвартим боку) авторе наводза же „Руснаци нє маю матичну жем”. И то реалносц, голєм у рамикох Националного совиту Руснацох, котри, ище скорей, вироятно ришел нє дзелїц заєднїцу по тим „боляцим” питаню.
А тото питанє, у ствари, у каждодньовим живоце найменєй болї и найменєй є важне, голєм кед слово о видаваню документох на мацеринским язику. То видно по резултатох виглєдованя нашого новнара за Шиду (опать на осмим боку), котри дознава же сримски Руснаци у матичара найменєй вибераю документи на мацеринским язику, за розлику од представнїкох словацкей и горватскей националней заєднїци. И то у пракси ище яке вигодне тим цо иду студирац, робиц або витвориц даєдни привилеґиї у матичней жеми – у твоєй општини ци ше вида вивод и нєт прекладательох у Заґребе, або Братислави.
И тоти Руснаци цо твердза же маю пейц матични жеми, и тоти цо за нїх Україна єдина матична, нїч би нє посцигли кед би ше Национални совит даяк опредзелєл по питаню матичней жеми.
Кед слово о матичней/их жеми/ох, анї потвердзеня, або документи достати у матичара у войводянских општинох би нє мали даяку значносц – анї у єдней жеми на Горнїци бачванско-сримски руски язик нє у службовим хаснованю.
Окрем кед же вам нє треба потвердзенє за упис до школох, у найвецей случайох зоз документами видатима по руски, у Сербиї будзеце мац лєм компликациї…
Алє, нє хасновац свойо права, та гоч и формално же би стали у витрини, значи пристац на самоасимилацию.
После документох и потвердзеньох, исте „прецо” себе можеме поставиц за школованє по руски, медиї, а вец и нач нам вообще бешедовац на тим микро-язику. И нємало людзох маю тоту подозривосц, або дзвигли руки од мацеринского.
Медзитим, принципиєлно потримац права своєй заєднїци, та гоч су формални, часто значи дозрец и розумиц же национални идентитет нє найважнєйша ствар у нашим живоце.
Пишце нам – tiznjovnjik@ruskeslovo.com.