КУЛА – Општина Кула одлучела вимириц цалосне длуство кулского Дому здравя за лїки, пишу „Вечернї новосци”, и од початку того рока з општинского буджету добавячом лїкох уж виплацени 16 милиони динари, так же и у ткв. „державних апатикох” уж єст лїки на рецепт. То видно и на нашей фотоґрафиї з апатики Здравственей амбуланти у Руским Керестуре, дзе дотераз були скоро цалком празни штелажи.
Як гварел предсидатель Скупштини општини Кула Велибор Милоїчич, з найвекшим добавячом лїкох за апатику кулского Дому здравя „Феникс” подписане спорозуменє по хторим длуство од 43 милиони динари будзе вимирене у 24-ох ратох у 2018. и 2019. року, а судске поровнованє подписане зоз штирома добавячами. З тогорочним ребалансом општинского буджету Дому здравя буду опредзелєни до 40 милиони дин. за длуство за лїки.
Цалосни поглєдованя за лїки 2012. року були коло 160 милиони дин., тераз длуство за лїки хтори ше видава на рецепт 78 милиони, а за лїки з неґативней лїстини коло 25 милиони, гварел директор Дому здравя Кула др Жарко Шевин.
Плановане же за горе спомнуту помоц у Дому здравя Кула будзе отворени окремни подрахунок пре контролованє трошеня пенєжу за лїки, прецо, як гварел др Шевин, у предходним периодзе и пришло до такого велького длуства, бо ше пенєж за набавянє лїкох трошело за други намени.