СРИМСКА КАМЕНЇЦА – Мария Горняк, народзена Скубан, вчера умарла у Сримскей Каменїци, у своїм 83. року живота.
Мария Горняк народзела ше у Коцуре 9. новембра 1935. року, дзе закончела и основну школу и нїзшу ґимназию зоз малу матуру. Понеже нє мала условия за предлуженє школованя, почала робиц як административни службенїк перше у тедишнєй Скупштини општини Коцур по 1957. рок, а у 1958. року преходзи на службу до Землєдїлскей задруґи, тиж у Коцуре. У 1960. року ше преселєла до Нового Саду и почала робиц у Державним архиве Войводини, на Петроварадинскей твердинї. У 1961. року преходзи на длужносц административного службенїка до Инститтуту за плюцово хороти у Сримскей Каменїци, дзе остава по 1985. рок, кед одходзи до пензиї. Як пензионерка жила у Сримскей Каменїци.
Писнї почала писац ище як школярка нїзшей ґимназиї, а перша, под насловом „Мацери”, обявена єй 1952. року у „Пионирскей заградки”. Зоз поезию ше интензивнєйше почала занїмац после преселєня до Нового Саду. Найвецей писнї обявйовала у „Пионирскей заградки” и „Литературним слове”, а найвецей тексти за компонованє написала у догварки зоз Маґдалену Горняк-Лелас, котра на нїх написала музику. Написала 21 текст, на котри зложена музика, виведзена на „Червеней ружи” и „Ружовей заградки”.
Най єй будзе вична памят!