Умар Павле Ризнич

автор ядю
925 Опатрене

ЧРНОМЕЛЬ (СЛОВЕНИЯ) – Всоботу, 19. мая, у Чрномелю у Словениї, у 81. року живота, умар Павле Ризнич, син нашого познатого театралного дїяча и наставнїка Петра Ризнича, котри зоз свою фамелию бул на отвераню тогорочного 50. Драмского мемориялу хтори ноши мено його оца.

Павле Ризнич народзени 30. юния 1937. року у Вербаше, дзе жил зоз фамелию покля його оцец Петро нє достал роботу у першей повоновей Ґимназиї у Руским Керестуре 1945. року. Павле бул єден зоз сновательох и член першого забавного оркестра „Сивґамуриз” хтори оформели Яким Сивч, Владимир Ґаднянски, Владимир Мученски и вон, у хторим грал на кларинету, а оркестер наступал на забавних вечарох и танцох младежи у валалє. У Керестуре остали по 1958. рок, а потим ше цала фамелия врацела до Вербасу.

Кед 1966. року умар Петро Ризнич, Павле зоз свою супругу Цветку одходзи до Словениї. У своїм роботним вику робел у вецей фабрикох на финансийох, алє мал у себе и вельку притоку ґу музики, уметносци, та роками гонорарно робел и у музичней школи, аж по пензию, и як знїматель у локалней телевизиї. (Розгварка з Павлом Ризничом обявена на нашим сайту и у новинох „Руске слово” ч. 15).

Павле Ризнич будзе поховани на стреду, 23. мая, на теметове Война вас у Словениї, а урна будзе виложена од 10 до 16 годзин.

ПОВЯЗАНИ ТЕКСТИ