МИНХЕН-КОЦУР – Дня 1. авґуста, у Минхену (Нємецка), у 71. року живота, умар др Силвестер Кухар, специялиста медицини роботи у пензиї, активни дзияк-аматер, снователь и перши предсидатель Дружтва нємецко-руского приятельства „Руснаци” у Минхену.
Др Силвестер Кухар бул єден з велького числа наших високообразованих людзох у Нємецкей, котри пред вецей децениями пошли на усовершованє до тей европскей жеми, а вец там нашли и ришенє своєй животней еґзистенциї. Скорей одходу до Нємецкей, дохтор медицини Силвестер Кухар, Коцурец, стредком седемдзешатих рокох прешлого вику єден час робел як лїкар у родзеним валалє, и як таки є добре познати своїм сонароднїком.
Силвестер Кухар народзени 13. мая 1946. року у Коцуре, дзе закончел основну школу. Oд 1962. до 1966. року бул школяр стреднєй вирскей школи, котру и закончел з покладаньом велькей матури у Державней ґимназиї у Крижевцох. После того одходзи на дворочне служенє воєного року. Року 1968. уписує студиї на Медицинским факултету у Беоґрадзе, дзе и дипломує 1973. року. Под час студийох написал вецей науково роботи з котрима наступал на конґресох югославянских медицинарох у Охридзе и Риєки.
Од 1974. до 1976. року роби як лїкар у Коцуре и Вербаше и источасно уписує постдипломски студиї у Беоґрадзе. Року 1976. одходзи на дальше усовершованє до Нємецкей. Поклада специялизацию з Медицини роботи на Универзитету у Минхену и 1985. року постава специялиста и управитель Центра за медицину роботи у тим городзе. По пензионованє бул доцент на Висшей поморскей школи у Бремену. Жил и умар у Минхену.
Др Силвестер Кухар будзе поховани нєшка, 5. авґуста, у Коцуре, а обряд хованя почнє на 16 годзин.