БРИЗБЕЙН (АВСТРАЛИЯ) – Дня 18. авґуста у Австралиї, у месце Бризбейну, у 88. року живота умар вельки мисионар, познати маляр, скулптор и всестрани майстор и будователь церквох – Данил Новак.
Паноцец Новак народзени у Коцуре, 28. юлия 1929. року од оца Данила и мацери Юлияни (народзеней Буша), и власни брат паноца Якова Новака, священїка у пензиї.
Студиї богословиї закончел у Торину, у Италиї, як монах Салезиянєц, а 1966. року го пошвецел за священїка у Риме кардинал Йосиф Слїпий.
После преподаваня у Українскей папскей малей семинариї на Виа Бочеа 480, дзе ше од 1967. року ше учели велї нашо нєшкайши паноцове, як зоз Босней так и зоз Бачкей, 1969. року одходзи на службу до Арґентини дзе будує и обнавя числени грекокатолїцки церкви, а 1989. року, на поволанку владики Прашка, одходзи до Австралиї дзе роби пасторално скоро до 2014. року, кед ше стрета особнє и зоз верховним архиепископом УГЦ Святославом Шевчуком.
После чежкей хороти о. Данил ше поцагує до пензиї дзе ище вше приходзи на богослуженя, дзекуюци своїм старательом паноцови Сапунови и фамелиї Милєнович, родом зоз Сримскей Митровици.
Паноцец Данил Новак будзе поховани на вовторок у Бризбейну, а Австралиї.