Управни одбор Заводу за културу розподзелєл пенєж за културни манифестациї

автор саб
818 Опатрене

НОВИ САД – Управни одбор Заводу за културу войводянских Руснацох на своєй другей порядней схадзки отриманей вчера, 2. авґуста, у своїм шедзиску у Новим Садзе принєсол одлуку о розподзельованю пенєжу по Конкурсу за орґанизованє манифестацийох наших културних дружтвох, прилапел текст конкурсу за директора Заводу, а бешедоване и о формованю и можлївим составе Орґанизацийного одбору Националного швета Руснацох у Суботици.

Два предлоги як розподзелїц милион динари, кельо буджет Конкурса за манифестациї, пририхтала Комисия хтору УО Заводу формовал на своєй першей схадзки, а членство Управного одбору ше з векшину гласох опредзелєло за вариянту по хторей финансийну потримовку достаню и манифестациї чий ношитель Дом култури Руски Керестур хтори пре препущенє у Конкурсу нє могол участвовац.

Прилапене же би вербаски КПД „Карпати” (Фестивал хорского шпиваня), КУД „Жатва“ з Koцура (Фестивал „Kоцурска жатва”), шидски КПД „Дюра Киш“ (Фестивал „Мелодиї Руского двору”) и КУД „Тарас Шевченко“ з Дюрдьова (Фестивал „Най ше нє забудзе”) достали по 95 тисячи динари, а Дружтво за руски язик, литературу и културу за два манифестациї (Днї Миколи М. Кочиша и Подобова колония „Стретнуце у Боднарова”) достало вкупно 50 тисячи.

МАТКА-Дружтво Руснацох Нового Саду-Войводини (Руски фестивал кратких сценских формох „Дюра Папгаргаї”), КУД „Петро Кузмяк“ з Нового Орахова (13.май – 70-рочнїца доселєня Руснацох до Орахова), РКЦ Нови Сад (Фестивал „Веселинка”), Дружтво Руснацох зоз Суботици („Яр Мафтея Виная”), Здруженє „Руснаци“ зоз Сримскей Митровици („Мацери Рускинї”), КПД „Иван Котляревски“ з Бикичу („Пришли нам Русадля”), РКУД „Др Гавриїл Костельник“ з Кули (Стретнуце рецитаторох) и Етно клуб „Одняте од забуца” (Ноц музейох) за свойо проєкти достали по 25 тисячи динари. Тельо додзелєне и Грекокатолїцкей парохиї Кирила и Мефтодия з Беоґраду за преславу Кирбаю кед ше сходза беоґрадски Руснаци.

Дом култури Руски Керестур за Фестивал „Червена ружа” достал 260, за Драмски мемориял 60, а за „Костельникову єшень” 25 тисячи динари.

Прилапени и текст Конкурса за вибор директора Заводу у складзе з Статутом установи хтори Управни одбор прилапел на прешлей схадзки. Статут на електронскей схадзки потвердзел  Национални совит Руснацох, и прешлїдзени є на верификованє покраїнскей Скупштини. Аж док Статут потвердза обидва соснователє Заводу, годзен буц розписани конкурс за директора.

Управни одбор Заводу за културу войводянских Руснацох зашедал у полним, дзевецчленим составе, схадзку водзел предсидателя УО Миломир Шайтош, а у роботи участвовала и о. д. директора Анамария Ранкович.

3.8-uozkvr 02

ПОВЯЗАНИ ТЕКСТИ