Упутени щири новорочни винчованки

автор ядю
867 Опатрене

НОВИ САД/КУЛА/ВЕРБАС/ЖАБЕЛЬ – Новорочни винчованки шицким гражданом своїх општинох упутел городоначалнїк Нового Саду, як и представнїки локалних самоуправох Кули, Вербасу и Жаблю.

Городоначалнїк Нового Саду Милош Вучевич пожадал гражданом цалей Сербиї добре здравє, же би кажде могол дац шицко од себе. Же бизме помагали єдни другим вше кед можеме, так як бизме любели же би и нам помагали.

–Нови рок нови початок, нова надїя, нови ентузиязем же бизме витворели свойо визиї и порихтани дочекали нови спокуси – поручел городоначалнїк Вучевич.

Предсидатель Дочасового орґану Општини Кула Велибор Милоїчич повинчовал Нови рок з наздаваньом же општина Кула и далєй будзе напредовац, а же шицким гражданом принєше мир, здравє и вельо особного и фамелийного щесца.

Свою винчованку, у мено руководства Општини Вербас, послал и предсидатель Општини Милан Ґлушац, вєдно зоз предсидательку СО Вербас Маряну Мараш. Винчуюци швета поручели же ше наздаваю же и идуцого року буду унапредзени шицки места општини Вербас, алє и медзилюдски одношеня, и же зробя шицко же би ґенерацийом цо приходза створели добри условия за живот.

Чедомир Божич, предсидатель Општини Жабель, свою новорочну винчованку послал з надїю же 2019. рок будзе рок у хторим ше буду препознавац и почитовац прави вредносци, з медзисобним почитованьом, а же би Општина була место нашей и будучносци наших дзецох.

ПОВЯЗАНИ ТЕКСТИ