БЕОҐРАД – Министер за роботу, обезпечованє роботи, борецки и социялни питаня Александар Вулин вчера, з нагоди означованя Шветового дня борби процив злохаснованя дзецинскей роботи, виявел же Влада Сербиї принєсла Уредбу о роботох котри младши од 18 роки нє шму робиц.
Уредба принєшена на предкладанє Медзинародней орґанизациї роботи (ILO), а почнє ше ю применьовац од януара 2018. року.
– Тота уредба облапя роботи хтори дошлєбодзени и леґални, алє пре чежину, опасносц и психофизични характеристики буду забранєни за дзеци – гварел Вулин и додал же Министерство у центрох за социялну роботу основало и 115 тими хтори ше занїмаю з феноменом дзецох на улїци.
Национални координатор Медзинародней орґанизациї роботи у Сербиї Йован Протич виявел же попри жобраня, злохаснованя дзецинскей роботи єст и у польопривреди.
– Аж 168 милиони дзеци у швеце злохасновани на даяких роботох. Число злохаснованя дзецинскей роботи ше виєдначує з числом нєзанятих – виявел Йован Протич.