НОВИ САД – Покраїнска влада на вчерайшей схадзки принєсла Покраїнску уредбу о условийох и способе додзельованя средствох з Буджетного фонду за запровадзованє мирох розвойней политики АП Войводини, з чим витворени правни условия за оперативне дїлованє на прицагованю нових домашнїх и странских инвестицийох.
З Уредбу ушорени два мири – потримовка за отверанє нових роботних местох и за додзельованє безповратних средствох за купованє опреми до привредних дружтвох, окреме у менєй розвитих општинох. Хаснователє тих стимулуюцих средствох можу буц мали, штреднї и вельки привредни дружтва, а средства, чия цалосна вредносц 350 милиони динари, буду додзельовани на основи конкурсох.
Покраїнска влада вчера прилапела и информацию о розподзельованю 44 милиони 21 960 динари з покраїнского буджету за вирабянє проєктно-технїчних документацийох нєобходних за реконструованє вецей ґеронтолоґийних центрох, домох за дзеци и младих без старосци родичох и за дзеци з почекосцами у розвою, як и за доми за одроснутих и стари особи з интелектуалнима почежкосцами.