ДЕВА (РУМУНИЯ) – На прешлей соботи отриманей схадзки Шветовей ради Русинох/Руснацох/Лемкох (ШР РРЛ) у румунским городзе Дева, члени Ради ускладзели одредби Нарису статуту Шветового конґресу (ШК) РРЛ, на чиїх вименкох и дополнєньох ше роби уж длугши час.
Як Рутенпрес дознава од член ШР, предсидателя Рускей матки Дюру Папуґу, Нарис знова пойдзе на розпатранє до орґанизацийох-членїцох Конґресу, же би Предлог статуту бул дати на прилапйованє на тогорочним зашеданю ШК на лєто у Осиєку, у Горватскей.
ШР прилапела и предкладанє Конґресней комисиї за културу, хтора 4. марца тиж зашедала у Деви, же би ше конкурс за додзельованє награди ШР РРЛ „Василь Турок Гетеш” розписало до конца априла, кеди почнє кандидованє за Награду. На сйадзки Комисиї за културу ШК спред Рускей матки присуствовал єй член Миломир Шайтош.
После схадзки ШР, домашнє Културне здруженє Русинох Румуниї отримало пригодну културно-уметнїцку програму з нагоди означованя Дня Русинох у Румуниї, хтори 3. марца.
Як гварел Папуґа, членом Ради винєшена и информация же означованє Дня Русинох на Закарпатю, у України, по други раз будзе орґанизоване 22. априла, а за свой дзень Русини Закарпатя одредзели 24. април – дзень народзеня Александра Духновича.