КОЦУР – Коцурски Мото-клуб „Пеґасус” през викенд, од 2. по 4. юний, у дворе и просторийох Клубу орґанизовал Мото-стретнуце и преславу свойого 11. родзеного дня. Родзени дзень „Пеґасус” того року преславел у одличней атмосфери и друженю, а попри домашнїх и госцох з околїска, були и госци з иножемства.
Байкере з нашей, та жемох бувшей Югославиї, алє и з Австриї и Мадярскей, до Коцура почали сциговац пияток дополадня, а исти вечар бул перши рок концерт, на хторим наступели рок-состави „Ґодфадерс“ з Червинки и домашнї „Демиґод“.
Всоботу пополадню отримани дефиле моторкох по Коцуре, а закончени є на Площи Николи Пашича у Вербаше, дзе байкере, вєдно з полицию, отримали указуюцу вежбу о безпечним воженю.
Всоботу вечар отримани и други рок-концерт, на хторим грали три ґрупи „Фауст“ зоз Суботици, „Фишерменс енд крокодлс“, хтора ма членох зоз Србобрану, Коцура и Нового Саду и „Андерхамер“ з Нового Саду.
Госцох, котри преспали у мото-кампу у дворе Клубу „Пеґасус“, домашнї випровадзели вчера рано.