Утвердзена концепция 57. Фестивалу „Червена ружа”

автор маф
907 Опатрене

РУСКИ КЕРЕСТУР – На вчера отриманей схадзки Програмского одбору 57. Фестивалу рускей култури „Червена ружа” утвердзена концепция програми, а найвецей уваги буду мац дзеци на ювилейним 50. „Червеним пупчу” и млади на змагательним вечаре у забавним духу„Червена ружа”. За приявйованє младих тих дньох орґанизатор Фестивалу Дом култури Руски Керестур розпише явну поволанку.

Концепция „Червеного пупча” будзе як и потерашнї роки, з тим з нагоди його ювилея буду додати ище даєдни змисти. После року павзи, на 50. „Пупчу” ознова буду виведзени и 10 нови композициї за дзеци хтори сцигли на конкурс орґанизатора.

„Червене пупче”, як уж скорей утвердзене, будзе першого фестивалского дня, 29. юния на 17 годзин, а на 21 годзин почнє манифестация „Одгуки ровнїни”. На нїх наступя културно-уметнїцки дружтва з наших местох, а у тей часци буду и точки хтори скорейших рокох мали место на Шветочним концерту. На 23 годзин за шицких учашнїкох и публику будзе друженє зоз живу музику.

Други дзень манифестациї, на соботу, 30. юния од 21 годзин предвидзени концерт даєдного госцуюцого ансамблу з нашей жеми лєбо иножемства, а од 22,30 г. змагательни вечар младих у забавним духу. У нїм будзе облапене змаганє за найкрасши глас, змаганє з авторскима шпиванками и з обробенима виключно рускима забавнима шпиванками зоз шицких часох, цо подрозумює и поп и рок и други файти сучасней музики. Явна поволанка за тоту часц Фестивалу тих дньох будзе розписана и обявена у наших медийох, а буду поволани млади зоз шицких наших местох.

ПОВЯЗАНИ ТЕКСТИ