РУСКИ КЕРЕСТУР – На схадзки Програмного и Орґанизацийного одбору 57. Фестивалу рускей култури „Червена ружа”, отриманей 29. мая, утвредзени програми Фестивалу хтори будзе 29. и 30. юния. Пременка на скорейши предкладаня же манифестация „Червена ружа”, як змаганє младих шпивачох и музичарох, будзе отримана перши вечар, пияток 29. юния. За Фестивал обезпечени милион 270 тисячи динари.
Фестивал будзе отворени на пияток, 29. юния, з виставу малюнкох младей уметнїци Лари Петкович з Нового Саду на 16,30 годзин, а на 17 г. почина ювилейне 50. „Червене пупче” хторе будзе у духу свойого родзеного дня, а попри традицийних и модерних танцох, буду виведзени и 10 нови композициї.
У предлуженю, на 22 годзин, почнє „Червена ружа” змаганє младих шпивачох и музичарох у забавним духу. У 10 точкох будзе змаганє за найкрасши дзивоцки глас, за найлєпшу авторску композицию и найлєпши вкупни наступ, а буду додзелєни и три пенєжни награди.
Други дзень Фестивалу, на соботу 30. юния, на 10 годзин почнє традицийни Керестурски саям старих ремеслох у Майсторским доме, а спортскей часци у рамикох Фестивалу того року нє будзе.
Вечар, на 21 годзин, почнє музично-фолклорна манифестация „Одгуки ровнїни” на хторей виступя нашо културно-уметнїцки дружтва и єден госцуюци ансамбл з Войводини.
У забавней часци пияток вечар после „Червеней ружи” у орґанизациї младежскей орґанизациї „Пакт рутенорум” грац будзе бенд „Банда дрвена”, а други вечар после „Одгукох ровнїни” наступи домашнї оркестер „Микс-бенд”.
Под час обидвох фестивалских дньох од 14 по 20 годзин за нащивительох будзе отворена Музейна збирка у будинку „Замок”.
Як потвердзене на схадзки, за Фестивал обезпечени милион 270 тисячи динари зоз вецей жридлох, од Републики, Покраїни, Општини Кула и Националного совиту Руснацох, а першираз и од Амбасади України у Сербиї.
Утвердзена и цена уходнїцох за Фестивал хтора будзе коштац 200 динари на дзень, а уход за дзеци шлєбодни.
