ВЕРБАС – У просторийох КПД „Карпати” у Вербаше вчера отримана схадзка Роботного цела за младеж Националного совиту Руснацох, на хторей як найзначнєйша точка розпатране и прилапене розписованє Конкурсу за витворйованє проєктох за младих у рускей заєднїци.
На схадзки розпатрани ище дзепоєдни поєдиносци конкурсу, котри будзе тирвац по 30. април того року. Окрем того, дочасово будзе розписани и конкурс за екскурзию, хтора би того року мала буц у юлию, у Ждинї, у Польскей, под час Фестивалу „Лемковска ватра”.
Члени Роботного цела прилапели и записнїк зоз прешлей, 8. порядней схадзки, прилапели План роботи и Финансийни план за 2018. рок, як и Звит о роботи и Финансийни звит за 2017. рок, а предсидатель Роботного цела Сашо Сабадош з тей нагоди привитал и нового члена, Милоша Малиша з Дюрдьова.
На схадзки розпатрани и информациї о знїманю видео материялох, хтори би ше потим могло дзелїц на дружтвених мрежох, а през хтори буду презентовани информациї о тим хто, дзе, на хтори способ и цо треба же би ше дахто уписал до окремного виберанкового списку, з оглядом же ше зоз тим достава можлївосц виходу на виберанки.
Окрем членох Роботного цела, на схадзки були и технїчни секретар Националного совиту Таня Арва Планчак и предсидатель Вивершного одбору Националного совиту Желько Ковач.
