У Водици було Стретнуце волонтерох Каритасу

автор маф
1k Опатрене

РУСКИ КЕРЕСТУР – У Водици прешлей соботи, 2. юния, отримане рочне Стретнуце волонтерох Каритасу нашого Апостолского еґзархату, на котре ше з векшини наших парохийох одволали коло 40 особи, вирни, дзевецме священїки и шестри Служебнїци.

Стретнуце почало з Молебеном до Богородици у водицовей церкви хторе служел керестурски капелан о. Михайло Шанта, а перше викладанє отримал домашнї парох о. Михайло Малацко на тему Каритасу, любови до ближнього и волонтеризму.

Директор Каритас нашого Еґзархату о. Владислав Варґа потим отримал викладанє на тему Мария и Каритас, а представителє парохийних Каритасох представели свою роботу. Тиж и шестри Служебнїци на чолє з провинциялну ш. Мартину Кмита представели свою роботу з дзецми широтами у Виноградове на Закарпатю.

На концу Стретнуца шицки волонтере поволани на Стретнуце волонтерох Каритасу Сербиї хторе будзе 16. юния у Зренянину.

ПОВЯЗАНИ ТЕКСТИ