РУСКИ КЕРЕСТУР – На инициятиву предсидателя Спортского дружтва „Русин” и тренера у Столнотенисерским клубе (СТК) „Русин” Драґана Ковачевича, а у поради з Месну заєднїцу Руски Керестур, тих дньох у Спортскей гали почало пририхтованє простору за тренинґи столнотенисерох – членох Клубу, як и рекреативцох.
Понеже простория под трибинами, дзе предвидзена ґуґларня, празна и нє хаснує ше ю за даяки намени, порадзене же би ше ю пририхтало за потреби столнотенисерох.
Як гварел Ковачевич, шицки роботи на пририхтованю тей сали буду поробени добродзечнє, та так тераз керестурска „Електромонтажа” там кладзе неонске ошвиценє и другу електричну инсталацию, а ошвиценє достате од Школи „Петро Кузмяк”, понеже го вона вецей нє хаснує.
На добродзечней основи плановане и обилїц просторию, а линолеум, як подлога на бетон, будзе купени з добродзечних прилогох столнотенисерох-рекреативцох. Як оценєл Ковачевич, роботи на ушореню простору вироятно буду закончени до шлїдуюцого викенду.
СТК „Русин” тренира и свойо службени змаганя бави у парохийней виронаучней сали, так же тренинґи и рекреативне бавенє столного тенису буду у новим просторе у Гали, а пре одредзени стандарди, змаганя ше, вироятно до єшенї, и далєй будзе бавиц у виронаучней сали.
