ДЮРДЬОВ – У дюрдьовскей ОШ „Йован Йованович Змай” вчера, 30. марца, отримана промоция Штреднєй школи з домом школярох „Петро Кузмяк” з Руского Керестура, насампредз єй Ґимназиї по руски, на хторей шицких присутних привитала директорка дюрдьовскей Школи Вукица Петрович.
Прейґ видео-биму приказани випатрунок Школи и школски просториї, змесценє у Доме школярох (интернату), Школска библиотека, физкултурна сала, терховня и други простори за рижни активносци у Школи, о хторих бешедовал педаґоґ у Школи „Петро Кузмяк” Иван Медєши.
О проєктох хтори керестурска Школа запровадзує бешедовала єй директорка Хелена Пашо Павлович, а школярки другей класи Ґимназиї на руским язику Марина Роман и Йована Ноґавица бешедовали о школованю, наставнїкох, можлївосцох за виражованє школярох у Школи и звонканаставних активносцох, як и о активносцох за младих у Керестуре – спортских у велїх спортских клубох, културних у рижних секцийох Дому култури, о розваги и друженю младих вообще.
Вони два визначели же наставнїки у Ґимназиї и Школи маю порозуменя за школярох и їх активносци, визначуюци же ше у Керестуре, як мирним месце, мож витвориц у рижних гобийох, алє и пошвециц ученю.
Штредня школа представена школяром шицких осмих класох дюрдьовскей ОШ, а школяром з руского оддзелєня предсидатель Вивершного одбору Националного совиту (НС) Руснацох Желько Ковач бешедовал о стипендийох хтори НС дава за предлуженє штредньошколского школованя у рускей Ґимназиї.
Так, школяре котри ше упишу до руского оддзелєня Ґимназиї у першим року маю безплатне змесценє и костиранє у интернату, найлєпши дзешецеро на лїстини за приєм до школи од НС доставаю стипендиї, алє постоя и стипендиї за успишносц и добри резултати у шицких штирох рокох ґимназийского школованя.
По законченю промоциї шицки школяре достали презентативни флаєр Штреднєй школи з домом школярох „Петро Кузмяк”, у хторей, попри Ґимназиї общого напряму на руским и сербски язику, роби и штредньошколски напрям Туристични технїчар, на сербским наставним язику.
