ЖАБЕЛЬ – У Жаблю будзе збудовани нови будинок за яшелька за змесценє дзецох од єдного до три роки, хтори би мал почац робиц од септембра 2018. року, догварене 4. мая на схадзки предсидателя Општини Жабель Чедомира Божича з директорку ПУ „Дзецинство” зоз Жаблю Светлану Бошков, членом Општинскей ради Жабель задлуженим за образованє Лазаром Чонкичом и одборнїком у Скупштини општини Жабель Мирком Осадковским.
Констатоване же уж роки у Жаблю и општини вельки проблем нєдостаток яшелькох, та заняти родичи нє маю дзе зохабиц мали дзеци, а як поведзене, то будзе ришене з вибудову нового обєкту за тоту намену.
Яшелька би мали буц збудовани у рамикох постояцей спомнутей ПУ, а пошвидко будзе виробени проєкт и обезпечена потребна документация, после чого почнє вибудов. За координатора вибудови яшелькох предсидатель Божич одредзел Лазара Чонкича, сообщела Служба за одношеня з явносцу Општини Жабель.