НОВИ САД – У Заводзе за културу войводянских Руснацох на пияток, 21. децембра будзе премиєрне емитованє першей видео приповедки „Тидвик, добродушни єлень“ Др Суса.
Текст видео приповедки робени по кнїжки истей назви хтору видала НВУ „Руске слово” ище 1953. року, а на ньго додати видео компоненти. Видео приповедка „Тидвик, добродушни єлень“ перша од штирох приповедкох котри буду реализовани у рамикох проєкта „Учме вєдно руски язик: Читай ми” авторкох Александри Живкович и Санї Дивлякович.
После премиєри, видео приповедка будзе положена на ютюб канал Заводу за културу войводянских Руснацох же би бул доступни ширшей явносци и уступени шицким хтори робя зоз дзецми по руски.
После проєкциї отрима ше крачунска и новорочна роботня за дзеци.
Ношитель того проєкта Новинарска асоцияция Руснацох, финансийну потримовку дал Завод за културу войводянских Руснацох, а потримовку дала НВУ „Руске слово”.