У Керестуре бул концерт Музичней школи за 8. марец

автор маф
1.1k Опатрене

РУСКИ КЕРЕСТУР – З нагоди наиходзацого швета 8. марца – Дня женох, школяре керестурского оддзелєня Школи за основне музичне образованє (ШОМО) з Кули, отримали концерт у преполней Хорскей сали Дому култури Руски Керестур.

Концерт у мено Школи отворел наставнїк Мирко Преґун и присутним женом повинчовал швето. Вон визначел же з тим концертом Школа потримує акцию процив парняцкого насилства з висловйованьом и записованьом красних словох хтори присутни могли написац и на окремним паноу. На концерту була присутна и директорка ШОМО Лїляна Барна Никитович.

DSCF8002 (2)_resize

Перши наступел Хор нїзших класох, а потим и 20 солисти на клавире, тамбурох, гармоники и кларинету, и трио гармоникох, од першей по шесту класу. Виведли красни репертоар мелодийох од класичних по народни, од єдноставних до зложених зоз хторима наступели найстарши школяре тамбураше Иґор Папуґа, Матей Катрина и Виктор Хрин, хторим то бул и ґенерални наступ пред тогорочнима змаганями.

Школярох за Концерт пририхтали їх наставнїки у керестурским оддзелєню Мирко Преґун, Геленка Гарвильчак, Мирон Сивч, Тамаши Ладислав и Дражен Тиквеша. Корепетиторки на концерту були Ева Епер и Снежана Ґавранов.

Осмомарцовски концерти ШОМО буду и нєшка и на ютре у Шветочней сали Школи у Кули на хторих наступя спомнути троме найстарши тамбураше з керестурского оддзелєня. Концерти почню на 19 годзин.

DSCF8008_resize

ПОВЯЗАНИ ТЕКСТИ