РУСКИ КЕРЕСТУР – Основна и штредня школа з домом школярох „Петро Кузмяк” з Руского Керестура нєшка и на ютре, 25. и 26. фебруара, будзе домашня трецому, закончуюцому стретнуцу школярох у рамикох проєкту „Карпатски паралели” – интеркултуралному диялоґу младих з румунскей, словацкей, сербскей и рускей заєднїци о заєднїцких политичних, економских и културних вязох. Ношитель проєкту Завод за културу войводянских Руснацох, з финансийну потримовку Фонду за отворене дружтво.
У проєкту участвую штредньошколци з Ґимназиї „Борислав Петрович Браца” з Вершцу, Ґимназиї „Михайло Пупин” з Ковачици, Ґимназиї и економскей школи „Светозар Милетич” зоз Србобрану и Ґимназиї „Петро Кузмяк”Руского Керестура.
Проєкт „Карпатски паралели” почал у септембру 2016. и тирва по конєц априла того року. Перше стретнуце концом прешлого рока отримане у Вершцу, друге початком того рока було у Ковачици, а у априлу будзе закончени зоз заєднїцким подписованьом спорозуменя о сотруднїцтве спомнутих школох, як и институцийох у култури.
Нєшкайше стретнуце почнє на 13 годзин, а после привиту представительох домашнїх буду два роботнї з темами „Цо можем меняц у моєй заєднїци и як” и „Моя заєднїца у 2030.”, хтори будзе водзиц Таня Лазор Обрадович.
На ютре будзе роботня з тему „Як видзим себе у будучносци як припаднїка националней заєднїци”, хтору водзи Єлена Перкович.
Учашнїки „Карпатских паралелох” нєшка у Керестуре нащивя и Катедралну церкву св. о. Миколая, а на ютре Србобран.
