РУСКИ КЕРЕСТУР – Всоботу, 8. юлия, Здруженє спортских рибарох „Коляк” з Руского Керестура перши раз орґанизовало змаганє у лапаню терпешох – „Терпешияду”.
Змаганє почало и мало буц отримане на беґелю Дунай-Тиса-Дунай, алє пре коровче хторе плївало по води, преселєне є на часц беґелю од базену по брану. Участвовали 15-еро змагателє, члени Здруженя з Керестура и Лалитю.
У катеґориї пионирох ше змагали пейцме хлапци и перше место освоєл Борис Жирош, зоз 115 ґрамами влапених терпешох, други бул Микола Максимович, а треце место завжал Иґор Папуґа.
У катеґориї сениорох було 10-еро змагательох и перше место освоєл Владо Югик зоз 1 076 ґрамами влапених терпешох, други бул Юлиян Няради, а треци Яким Джуджар.
По законченю змаганя за шицких учашнїкох и членох Здруженя у лєтнїковцу рибарох на базену бул полудзенок, а предсидатель Здруженя Михайло Пашо побиднїком у сениорскей катеґориї уручел медалї, а пиониром за перше и друге освоєне место по маїцу, а за треце ґереґу.
