РУСКИ КЕРЕСТУР – Месна орґанизация (МО) пензионерох Руски Керестур вчера, 26. фебруара, на порядней Рочней скупштини-зборе прилапела звит о роботи и финансийни звит за 2016. и план роботи за тот рок, додзелєни подзекованя, а принєшена и одлука о членарини у 2017. року. Попри членох МО, на схадзки Скупштини присуствовали и предсидатель Општинского здруженя пензионерох Кула Душан Пеянович и член Вивершного одбору Општинского здруженя Стеван Раїч.
У звиту о роботи за прешли рок предсидатель МО пензионерох Ярослав Малацко гварел же, и попри одредзених финансийних почежкосцох, Орґанизация зазначела вецей активносци, насампредз вязани за набавянє рижних поживових продуктох и огриви за своїх членох и старим особом по вигоднєйших ценох и з можлївосцу плаценя на вецей раз, орґанизовани рижни здравствени препатрунки, одход на одпочивок и регабилитацию, преподаваня о здравим костираню и охрани од хоротох, робело ше на уписованю пензионерох за животне осиґуранє, як и на уписованю нових членох, котрих тераз у Керестуре єст 1 000, а коло 400 з нїх плаца и членарину. Тиж так, прейґ МО пензионере могли заменьовац и стари за нови здравствени кнїжочки.
Дружтвени и културно-забавни живот пензионерох бул орґанизовани вєдно з Клубом пензионерох, хтори поряднє роби у їх Доме, участвовали на змаганю у Врнячкей банї, орґанизовани акциї на порянєю Дому и коло нього, поставена метална ограда коло загради Дому, єден ПВЦ облак, а попри активних членох, МО мала потримовку и од Месней заєенїци, ЯКП „Руском” и других валалских здруженьох.
Финансийни звит на Скупштини поднєсол касир МО Йоаким Рац, з хторого видно же цалосни приходи були дацо вецей як 405 000 динари, розходи нє цали 350 000, так же Орґанизация дїловала позитивно, а вязано за финансиї поведзене же даскельо хаснователє огриви и дзеподних продуктох ище вше нє вимирели свойо длуство. Прето заключене же ше убудуце нєпорядним з плаценьом нє будзе давац услуги, односно же их годни хасновац кед за нїх перше у цалосци виплаца.
План роботи за тот рок подобни як и прешлорочни, а предсидатель Општинского здруженя пензионерох Душан Пеянович поволал членох же би ше животно осиґурали, як и свойо малженски пари котри нєзаняти, лєбо нє доставаю пензию, под истима условиями.
З гласаньом одлучене же попри обовязней рочней членарини, хтора тераз 300 динари, члени МО Руски Керестур у тим року буду плациц ище 100 динари, цо будзе хасноване за рижни потребни оправяня у Доме пензионерох.
На Скупштини додзелєни и Подзекованя за помоц Месней орґанизациї и за активне анґажованє у єй роботи, хтори достали Михал Бесерминї, котри безплатно направел спомнуту ограду, Ярослав (Янко) Джуджар за активносц у Орґанизациї, як и пекар Михайло Макаї, котри помага пензионером кед им то потребне.