РУСКИ КЕРЕСТУР – На терену у дворе Старей школи у Руским Керестуре тирва популарни Ноцни турнир у малим фодбалє, хтори орґанизує Спортске дружтво „Русин”
Приявени екипи розподзелєни до штирох катеґорийох – младши пионире, пионире, сениоре и ветеранє, а за тераз ше бави по ґрупох, лєбо кажде з каждим.
У катеґориї младших пионирох бавя 5 екипи – два з Керестура, два з Коцура и єдна з Пиньвиц, а у катеґориї старших пионирох штири екипи – два з Керестура и по єдна з Коцура и Пиньвиц.
Найвецей, аж дзешец екипи, єст у конкуренциї сениорох, дзе пейц з Керестура, два з Вербасу и по єдна з Кули, Крущичу и Каравукова. У катеґориї ветеранох ше змагаю 5 екипи – три з Керестура и по єдна з Коцура и Червинки.
Змаганя ше бавя кажди вечар, крем соботи, кеди шлєбодни дзень, а бави ше по два змаганя (комбиновано) з ґрупох пионирох и ветеранох и по два змаганя сениорских екипох.
Уходнїца за турнир кошта 50 динари, односно 30 за младших, а источашнє є и тикет за каждовечаршу томболу за патрачох.