КУЛА – У Войводини почина вибудов штирох залївних системох, од вкупно 11 котри заплановани у цалей держави. Вибудов ше финансує з кредитом од 100 милиони долари котри Сербия достала од Зєдинєних Арабских Емиратох (ЗАЕ), виявела о. д. Републичней дирекциї за води Наташа Милич.
– Роботи буду започати у наступним периодзе, а буду тирвац од седем до дванац мешаци. Док будзе закончена тота система, нови 20 000 гектари буду мац приступ залївним системом – гварела Миличова.
У першей фази роботох вода будзе приведзена по комплекси за наводньованє, а други два фази роботох оможлївя и же би крайнї хаснователь мал приступ ґу води. У Войводини роботи започню на двонаменских системох – Янков мост у Зренянину, Итебею, Медї у Житишту и Речею у Кули.
То беґелї котри скорей були хасновани лєм за одводньованє, а тераз до нїх буду положени вельки пумпи котри буду полнїц спомнути ярки з беґелю Дунай-Тиса-Дунай, або з околних рикох, зависно од водостаю. Так же у нїх будзе вше води же би польопривредни продукователє могли залївац свойо поля.