БЕОҐРАД – У Народней скупштини Републики Сербиї, окрем сербского, язика векшинского народу, убудуце ше официйно годно бешедовац и по руски, горватски, македонски, румунски, ромски, словацки и других националних меншинох.
Тото „Рутенпресу” сообщела Олена Папуґа, посланїца Лиґи социялдемократох Войводини у Народней скупштини Републики Сербиї, котра гвари же ше особнє „виборела же би язик и писмо националних меншинох вошол до Парламенту”.
На дньовим шоре у Парламенту нахoдза ше вименки Закона о националних меншинох, Закона о службеним хаснованю язика и писма и Закона о правох националних меншинох.
Влада Републики Сербиї и Министерство за локалну управу и самоуправу прилапели амандмани Папуґовей зоз хторима ше дава право народним посланїком же би бешедовали у Парламенту на своїм мацеринским язику.
Народни посланїк хтори припаднїк националней меншини убудуце будзе мац право же би на пленуме Народней скупштини бешедовал на мацеринским язику, алє и же би писани документи за роботу Парламента, а хтори одредзени з Дїловнїком, давал на мацеринским язику. Ґенерални секретар Парламента длужен обезпечиц прекладанє його бешеди у пленуме, або документа хтори поднєсол на сербски язик.
„То сущносц амандманох на закони хтори поднєсли посланїки Лиґи социялдемократох Войводини. Зоз прилапйованьом тих амандманох, после Скупштини Войводини и републични Парламент будзе пестовац мултинационалносц и вецейязичносц”, гвари Папуґова и додава же за тото прилапйованє заслужна добра дзека и кооперативносц Министерства за локалну управу и самоуправу.
З оглядом же коалиция на власци потримала тот амандман, обчекує ше же вон будзе прилапени шлїдуюцого тижня, у дню за гласанє.
Най здогаднєме, член 10. Предлогу закона о вименкох Закона о правох националних меншинох предвидзел же би право бешеди на мацеринским язику на пленарних схадзкох у Парламенту мали лєм посланїки хтори по численосци маю два одсто численосци у Републики Сербиї, та би таке право мали лєм Мадяре, Бошняки и Албанци.
Посланїца Лиґи социялдемократох Войводини твердзи же то дискриминация других националних меншинох хтори жию у Републики Сербиї, прето гвари же поднєсла амандман зоз хторим шицки меншини маю право бешедовац на своїм язику у Парламенту.