У Новим Садзе почина Фестивал националних кухньох

автор ядю, фото вев
1k Опатрене

НОВИ САД – Други по шоре Фестивал националних кухньох „Фуд Планет”, котри орґанизую компаниї Колор Прес Ґрупа и Нинамедиа, почнє нєшка, 11. мая и будзе тривац по 3. юний на Площи шлєбоди у Новим Садзе.

На Фестивалу ше представя иножемни амбасади и привредни комори зоз националнима кухнями и културним скарбом жемох зоз котрих приходза.

За дакус вецей як три тижнї на Площи шлєбоди, Новосадяном и госцом, кажди дзень ше представи друга жем, а орґанизаторе жадаю до швета послац красну слику зоз Нового Саду, понеже туристични указателї потвердзую же иножемни туристи вше частейше приходза до того городу.

Фестивал националних кухньох представя початок лєтнїх манифестацийох, а Туристична орґанизация Нового Саду по нєдзелї почнє з промоцию лєтнєй туристичней сезони.

Отверанє фестивала заказане за 18 годзин, а перша жем котра ше представи будзе Чарна Гора.

Нащивителє буду мац нагоду и покоштовац специялитети рижних националних кухньох, упознац културни скарб тих жемох и уживац у їх традицийней и сучасней музики.

ПОВЯЗАНИ ТЕКСТИ