У „Пальчочки” почали друженя руских дзецох

автор фес
1k Опатрене

НОВИ САД – У Новим Садзе вчера, 20. септембра, у обєкту „Пальчочока” Предшколскей установи „Радосне дзецинство” почали воспитно-образовни активносци по руски з дзецми од три до шейсц роки, односно по предшколски возрост.

З дзецми и у тим  2017/18. школским року будзе робиц вихователька Александра Колбас, а вчера на друженє пришли седмеро дзеци з родичами.

Дзеци и родичох привитала секретар-заступнїк Дружтва за руски язик, литературу и културу Ирина Папуґа, надпоминаюци же Дружтво, у сотруднїцтве з його Активом вихователькох руского язика, предложело  же би ше, як и скорейши роки, анкетовало родичох о заинтересованосци же би їх дзеци ходзели на спомнути активносци по руски, та за тераз на списку єст вецей як двацецеро дзеци. По словох Папуґовей, будзе добре кед до „Пальчочки” поряднє будзе ходзиц половка з уписаних.

Активносци буду каждей стреди од 18 до 19 годзин у спомнутим обєкту (ул. Бранимира Чосича 40), у рамикох проєкту „Учме руски язик”, та Дружтво за руски язик поволує родичох же би у цо векшим чишлє приводзели свойо дзеци на тоти активносци.

О термину активносцох з предшколскима дзецми буду поинформовани и учительки котри робя з нашима дзецми, як и руководителє секцийох у Руским културним центре у Новим Садзе, же би ше у тот час кеди друженя дзецох у „Пальчочки” нє отримовало и други активносци.

 

ПОВЯЗАНИ ТЕКСТИ