ПЕТРОВЦИ (ГОРВАТСКА) – Отец Томислав Дудаш народзени 24. октобра 1956. року у Петровцох, од оца Дюри и мацери Ирини народзеней Папуґа. Зоз фамелиї вишол ище єден священїк, покойни о. Йоаким Дудаш, Томиславов брат.
Основну школу и Ґимназию закончел у Вуковаре, а потим бул у Папскей малей семинариї у Риме. Теолоґию дипломовал на Богословским факултету у Заґребе. За диякона є пошвецени 24. октобра 1982. року у Руским Керестуре, по рукох владики Йоакима Сеґедия, а за презбитера 1. мая 1983. року у Вуковару по рукох владики Славомира Микловша.
Бул капелан у Шидзе, а од 1984. року управитель парохиї Беркасово. Под час войни у Горватскей, 1991. року, кед ґранатовани Вуковар, ранєти є вєдно з оцом у своєй фамелийней хижи, а потим, познєйше, є вицагнути зоз вуковарского шпиталю и однєшени до Заґребу. Пре покалїченя му ампутована нога. После окрипеня пошол до Нємецкей, дзе пасторално робел на тамтейших римокатолїцких парохийох.
Паноцец Томислав ше занїмал з видео-знїманьом. Зоз свою камеру вон зазначел велї историйни подїї зоз живота и рижних святочносцох у нашим Владичестве, а окреме на руских парохийох. Тоти його знїмки барз вредни документарни материял о єдним периодзе нашого живота.
Року 2017. врацел ше до Горватскей як пензионер и жил у Вуґровцу при Заґребе, дзе у своєй хижи умар 2. мая 2018. року. Отец Томислав Дудаш поховани у Петровцох 4. мая.