ВЕРБАС/СВИДНЇК – Прешлого викенду, на закончуюцих дньох „Русинского фестивалу” у Свиднїку, у Словацкей, окрем аматерох КПД „Карпати” хтора наступели всоботу, 26. мая, пребувало и руководство Општини Вербас на чолє з предсидательом Миланом Ґлушцом, представителє „Карпатох”, як и заинтересовани з вецей местох котри пошли провадзиц Фестивал.
На урядовим стретнуцу зоз городоначалнїком Свиднїку Яном Голодняком означена дзешата рочнїца возпоставяна братских одношеньох Свиднїку и Вербасу, а розпатрени и можлїви модели сотруднїцтва.
Наступ членох КПД „Карпати” бул окреме замерковани, та руска Жридлова шпивацка ґрупа зоз провадзацим оркестром, солистка Славка Тамаш и Янко Сеґеди достали моцни аплаузи. З аматерами у Свиднїку були и предсидатель Дружтва Славко Барановски и подпредсидатель др Деян Загорянски.
Ношитель проєкту одходу до Свиднїку за Вербащанох, уж шести раз, було КПД „Карпати”, а орґанизатор др Деян Загорянски, док ше за одход на Фестивал заинтересованих зоз Руского Керестура, Коцура и Нового Саду постарала посланїца у Народней скупштини Републики Сербиї Олена Папуґа. Вони, окрем Свиднїку, мали нагоду нащивиц и Кошици, Прешов, Бардейов, Бардейовски Купелї и Дуклю.