БЕОҐРАД – За остатнї шейсц мешаци, у одношеню на исти период прешлого року, у Сербиї скоро за 8 одсто звекшане число оглашкох за роботни места у продукциї, услугох, администрациї и креативи, указую податки сайту poslovi.infostud.com. За роботни места у спомнутих обласцох до половки того рока було 7 851 оглашки, а у исти час прешлого року 7 297.
Векше глєданє роботнїкох у ИТ-сектору, машинстве и електротехнїки, потим у услужних дїялносцох (туризем и погосцительство), администрациї и рахунководстве, праву, фармациї, здравстве и дизайну, гваря з Инфостуду.
Найвекше пороснуце у понуканю роботох у ИТ секторе, дзе ше у одношеню на єдного фаховца 2009. року тераз глєда шейсцох, у машинстве тото одношенє єден наспрам пейц, а у електротехнїки єден наспрам штири.
Попри спомнутих, глєдало ше и автомеханїчарох, кухарох, месарох и байберох. Пред трома роками, єдни з найглєданших були комерциялисти, а прешлого року вожаче.
Поровнуюци период од 2014. по 2106. рок, обачлїви пременки и у ступньох образованя хтори роботодавателє вимагаю у оглашкох. У 2014. року за 48 одсто понукнути роботи була потребна штредня школа, а у прешлим року тот процент пороснул на аж 60 одсто.
Зменшане число оглашкох у хторих ше глєда роботнїкох з висшу, високу школу и бечелор диплому – зоз 36 одсто 2014. и 2015. року на 24 одсто у 2016. року. Мале зменшанє зазначене и у глєданю роботнїкох з факултетску диплому, лєбо мастером.
Медзи кандидатами котри прешлого року конкуровали на оглашки вецей як половка мали факултетску диплому и званє мастера високей, висшей школи, або бечелор диплому, док кандидатох за роботу зоз штредню школу було коло 40 одсто.