НОВИ САД – У рамикох Мешаца кнїжки и Манифестациї „Поетски нїтки Меланиї Павлович”, у Скупштини АП Войводини у Новим Садзе вчера, 18. октобра, отримана промоция Зборнїка „Студия Рутеника” ч. 22 и кнїжки „З червеним дописане” мр Гелени Медєши, у виданю Дружтва за руски язик, литературу и културу. Виданя обявени з помоцу донациї з Канади и Покраїнского секретарияту за управу, предписаня, образованє и национални меншини-заєднїци.
Шицких присутних привитала и змист 22. числа „Студиї Рутеника” представела секретар Дружтва Ирина Папуґа, а у тим чишлє 20 авторе обявели 40 роботи. З тей нагоди представела и редакцийни тим „Рутеники”, а Папуґова окреме визначела же „Рутеника”, под ознаку „наукова публикация”, єдина такей файти виданя при Руснацох.
О кнїжки „З червеним дописане” бешедовала сама авторка мр Гелена Медєши, надпоминаюци же у кнїжки єст надосц приклади словох и конструкциї хтори можу представяц почежкосц у язичней пракси и спричиньовац нєсиґурносци – як глаша правилни форми, як ше даєдни слова пише – вєдно чи окреме, зоз смугу, смужку чи без нєй, з вельку чи з малу букву. У кнїжки и приклади словох хтори по форми исти або подобни, а хторим значенє зошицким иншаке, цо може буц причина нєясносцом и нєпорозуменьом.
Кнїжка будзе хасновита насампредз тим цо ше з язиком професийно занїмаю (наставнїки, лекторе, прекладателє, науковци, писателє, новинаре, явни особи, службенїки у администрациї…), алє и школяром, студентом и шицким цо сцу дознац вецей о нашим язику, а написана є з лєгким, популарним, аж и жартовлївим способом.
Вчерайше представянє кнїжкох Дружтва за руски язик орґанизоване вєдно з Покраїнским секретариятом за управу, предписаня, образованє и национални меншини-заєднїци, а на промоциї були и числени госци – бувши директор НВУ „Руске слово” Любомир Медєши з Канади, докторант на славистики з Япону Канаме Окано, др Вера Васич, др Радмила Шовлянски, предсидатель Управного одбору Заводу за културу войводянских Руснацох Миломир Шайтош, як и Адриян Ґорки спред Секретарияту за образованє, заменїк омбудсмана Янош Орос и други.