У Школи барз успишни Новорочни вашар

автор маф, фото: Кристина Афич
820 Опатрене

РУСКИ КЕРЕСТУР – У Основней и штреднєй школи „Петро Кузмяк” вчера отримани традицийни Новорочни вашар на хторим школяре предавали новорочни прикраски хтори сами направели. З тей нагоди назберане коло 61 000 динари, цо вельо вецей як влонї.

Назберани пенєж ше кажди рок дарує тим котрим є найпотребнєйши у локалней заєднїци, а того року будзе наменєни школяром самей керестурскей школи. Иншак вашар у континуитету уж штварти раз орґанизовани, а иницияторка такей идеї  була професорка математики Наталия Будински.

– На тот способ Школа шветочно закончує перше полрочє и з тим пестує и дух заєднїцтва и позитивного одношена ґу своєй школскей заєднїци – виявела за Рутенпрес професорка Будинскова.

У уметнїцкей часци на ґитарох наступели матуранти рускей ґимназиї Жарко Остоїч и Павле Рац, а пришол и Дїдо Мраз зоз хторим ше могло висликовац. Шицки присутни на вашаре були понукнути зоз малим дарунком – бомбону и новорочним порученьом.

На вашаре участвовали шицки класи школярох од першей основней по матурантох штредньошколцох вєдно зоз своїма наставнїками. Вашар нащивели родичи и други заинтересовани, а були и госци зоз Ґимназиї у Вербаше.

ПОВЯЗАНИ ТЕКСТИ