РУСКИ КЕРЕСТУР – З нагоди 8. марца у голу Школи „Петро Кузмяк” 7. марца отворена подобова вистава з меном „Женом на дарунок”, на хторей виложени коло 40 малюнки уметнїкох зоз Здруженя подобових аматерох „Ателє 05” з Вербасу.
Виставу отворела заменїца директорки Невенка Пєщич хтора з педаґоґиню Любицу Няради и орґанизатор вистави, и привитала присутних представительох Здруженя, предсидателя Драґана Симича и членох Милосава Павловича, Снежану Вуйошевич и Ґрадимира Ґлушца.
Роботу „Ателєа” и малюнки кратко представел його предидатель Симич и визначел же Здруженє реґистрованє лєм три роки, алє нєформално роби уж 13 и ма коло 50 членох, найвецей малярох-аматерох з цалей вербаскей општини и ширше, та и Руснацох з Коцура, Нового Саду, а його члени и вельо наградзовани на покраїнских смотрох.
На отвераню Вистави були присутни и школяре и їх наставнїки хтори ше з уметнїками дружели и випитовали о їх малярскей роботи.
На вистави виложени скоро 40 малюнки у рижних технїкох и темох, од пейзажох, мертвей природи и иконох, а вистава ма и предавацки характер. У школским голу є отворена шлїдуюци 8 днї и можу ю през цали дзень нащивиц и шицки заинтересовани жителє Керестура.