ВЕРБАС – У општини Вербас ше на предсидательних виберанкох вчера, 2. априла, гласало на 36 виберацких местох, до виберацкого списку були уписани 35 889 гражданє, а по нєурядових податкох, у цалей општини гласали аж 22 202 гражданє, цо 61,85 одсто з числа уписаних до виберацкого списку.
По нєурядових резултатох, найвецей гласи – 12 042, лєбо 54,2 одсто достал Александар Вучич спред владаюцей коалициї на чолє зоз Сербску напредну странку. На другим месце по освоєних гласох Саша Янкович спред ҐГ „За Сербию без страху”, котри достал 3 404 гласи, лєбо 15,3 одсто, а на трецим месце Лука Максимович спред ҐГ „Любиша Прелетачевич Били-Лєм моцно” зоз 2 043 освоєнима гласами, односно 9,2 одсто.
Др Воїслав Шешель спред Сербскей радикалней странки зоз 1 390 гласами, лєбо 6,2 одсто на штвартим месце, а на пиятим Вук Єремич спред ҐГ „Мушиме лєпше” зоз 922 гласами, цо 4,1 одсто.
Шлїдза Бошко Обрадович, котри у вербаскей општини достал 595 гласи (2,6 одсто), Ненад Чанак, котри достал 535 гласи (2,4 одсто), Саша Радулович – 499 гласи (2,2, одсто), Милан Стаматович – 132 гласи (0,59 одсто), др Александар Попович 94 гласи (0,4 одсто) и Мирослав Парович, котри достал 93 гласи (0,4 одсто).
