У локалних самоуправох хибя совити за медзинационални одношеня

автор тнґ/ртв/зам
978 Опатрене

БЕОҐРАД – Гоч то обовязка по Законє о локалней самоуправи, хтори принєшени пред дзешец роками, ище нє у шицких локалних самоуправох з етнїчно мишаним жительством основани Совити за медзинационални одношеня. Спомедзи 72-ох мишаних штредкох у Сербиї, тоти совити основани у 53-ох, а крем єдного, у прешлим року нє отримали анї єдну схадзку, спозорел вчер, 8. септембра, Защитнїк гражданох Зоран Пашалич на сходзе на хторим представел Окремни звит Защитнїка гражданох о совитох за медзинационални одношеня.

1-Pasalic-02

Сербия и з Акцийним планом за Поглавє 23 ма обовязку запровадзовац хасновите дїлованє совитох за медзинационални одношеня у шицких национално мишаних локалних штредкох, алє совити нє зажили у пракси.

Омбудсман визначел важносц тих совитох, як и же з вименками Закона о локалней самоуправи треба прецизнєйше дефиновац одредби о националней ровноправносци, алє потребне и вельо лєпше орґанизовац совити за медзинационални одношеня на локалу.

Помоцнїца министра державней управи и локалней самоуправи Ивана Антич на спомнутим сходзе гварела же вименки Закона о локалней самоуправи уду у напряме препорукох омбудсмана, як и же у креированю политики у тей обласаци буду мац у оглядзе и тот звит омбудсмана.

О.д. директора Канцелариї за людски и меншински права Сузана Паунович визначела же Сербия ма добри законодавни рамик за витворйованє правох националних меншинох, цо потвердзели и медзинародни цела, алє дзепоєдни одредби законох нє зажили у пракси и остали мертве слово на паперу.

Пауновичова дополнєла же, по податкох Канцелариї, лєм у 16 єдинкох локалней самоуправи було активного дїлованя совитох за медзинационални одношеня, як и же Окремни звит защитнїка гражданох дава напрями и препоруки Влади Сербиї, алє є и добра основа локалним самоуправом за ришованє проблемох у тей обласци. 

 

 

ПОВЯЗАНИ ТЕКСТИ