НОВИ САД – У двацец пиятим тогорочним чишлє новинох „Руске слово” у рубрики „Тижньовнїк” информациї о активносцох Националного совиту Руснацох и финансованю наших здруженьох у шидскей општини, а рубрика „Нашо места”, медзи иншим, пише о резултатох гуманитарней акциї за помоц Желькови Шантови з Коцура и о ришованю проблему з воду за пице у вербаскей општини.
На „Економиї” текст о жатви ярцу у керестурским хотаре и о надополнєню чкоди хтору на польох у Коцуре направел НИС под час випитованя нафти и ґазу.
Рубрика „Култура и просвита” зазначела привити першокласнїкох у керестурскей и коцурскей школи, резултати малей матури у наших школох, явну годзину КУД „Тарас Шевченко”, а ту и интервю з Иґором Обровским, подобовим уметнїком и сценоґрафом на РТВ Войводини.
Попри вистки о першопричашнїкох у коцурскей парохиї, „Духовни живот” понука и розгварку з о. Владиславом Варґом, док рубрика „Людзе, роки, живот” читачох упознава з Михалом Чаканом з Дюрдьова, Гавриїлом Колєсаром з Канади и Деяном Маґочом з Америки.
Рубрика „Спорт” дава ретроспективу полусезони Шаховского клубу „Русин” з Керестура, резултати зоз СБ „Яша Баков” у Новим Орахове за фодбалерох-пионирох, а ту и текст о вельким успиху пионирох Рукометного клубу „Вербас”. У тим чишлє додаток „Литературне слово”.