НОВИ САД – Рубрика „Тижньовнїк” у дзевятим тогорочним чишлє новинох „Руске слово” понука огляднуце на интеркултурални проєкт „Карпатски паралели”, чия закончуюца практична часц отримана и у Керестуре, а дати и звит з Округлого столу о европских интеґрацийох и националних меншинох у Сербиї.
На „Наших местох” информация о потребних активносцох Керестурцох пред початком виглєдованя нафти и ґазу у тим месце, а ту и звити зоз схадзки Совиту керестурскей Месней заєднїци, з рочних скупштинох Рускей матки, Месней орґанизациї пензионерох и Добродзечного огньогасного дружтва у Керестуре.
„Култура и просвита”, медзи иншим, зазначела Виберанкову скупштину КУД „Жатва” у Коцуре, Саям образованя у Вербаше, а пише и о новим компакт-диску Хору „Розанов” з Дюрдьова. На тих бокох и наява Фестивалу новей рускей народней шпиванки „Ружова заградка” и Драмского мемориялу Петра Ризнича Дядї.
„Економия” пише як ше одвива проєкт енерґетскей ефикасносци у Вербаше, а понука и напис о розвою малинарства у Коцуре.
Рубрика „Людзе, роки, живот” представя Аранку Медєшову з Коцура и Звонка Костелника з Петровцох, док на „Духовним живоце” огляднуце на Каритасову гуманитарну акцию у Коцуре и текст о Тижню пребачованя пред Вельконоцним постом у Дюрдьове.
На „Спорту” читаче вецей дознаю о змаганю у билияру у рамикох Спортских бавискох „Яша Баков”, виборе найлєпших спортистох у Вербаше и активносцох Здруженя спортских рибарох „Коляк” з Руского Керестура. Додаток у тим чишлє „Дикица”.