НОВИ САД – У пейдзешатим тогорочним числу новинох „Руске слово” на бокох „Тижньовнїка” обявене штварте предлуженє напису о законченю Першей шветовей войни и присоєдинєню Войводини ґу Кральовини Сербиї автора Сашу Сабадоша.
Рубрика „Нашо места” пише о наиходзацих локалних виберанкох у општини Кула, а дати и звити зоз скупштинох општинох Шид и Вербас, док „Економия” пише о продукциї швиньох.
„Духовни живот” преноши вистку о преглашеню нашого Еґзархату за Епархию св. Миколая у Руским Керестуре, а мож пречитац и о стретнуцу Вечар приятельох у Вербаше.
„Култура и просвита” ше оглядла на госцованє керестурского Хора у Кошицох у Словацкей и на промоцию моноґрафиї „50 роки Драмского мемориялу Петра Ризнича Дядї”. У тей рубрики представени и Руски християнски календар за 2019. рок и дати звит зоз Фестивалу малих сценских формох „Дюра Папгаргаї” у Новим Садзе.
„Мозаїк” пише о тим як треба злєпшац безпечносц младих у транспорту, док рубрика „Людзе, роки, живот” представя Бобальову фамелию з Бикичу, Даринку Дудаш з Керестура и роботу Здруженя пензионерох у тим валалє.
„Спорт” дава вистки з роботи рукометней секциї у керестурскей Школи, резултати Мемориялного турниру у шаху у Коцуре, а ту и интересантни текст о тим як повязани спорт и психолоґия.
Як додаток вишла „Дикица”.