У рамикох 24. Стретнуцох Актив наставнїкох руского язика

автор маф
1.2k Опатрене

РУСКИ КЕРЕСТУР – У Основней и штреднєй школи „Петро Кузмяк” вчера отримани 24. Стретнуца руских школох у чиїх рамикох отримани Актив наставнїкох руского язика зоз скоро шицких наших местох, як и зоз Петровцох у Горватскей. Орґанизатор стретнуцох з домашню Школу Дружтво за руски язик, литературу и културу.

Присутних наставнїкох руского язика з порядней и виборней настави, як и учительки з домашнєй школи, привитала директорка Хелена Пашо Павлович и представела роботу тей найвекшей рускей школи у чиїм составе роби основна школа зоз 260 школярами у 16 оддзелєньох и 12 оддзелєня штредньошколцох, медзи хторима и ґимназиялци у руских оддзелєньох.

Секретарка Дружтва Ирина Папуґа представела и два виданя Каталоґу пошвеценого Стретнуцом руских школох, пречитана и програмска писня Стретнуцох „Руским дзецом” Гавриїла Надя и „Руска твердиня” Миколи М. Кочиша. А чесц з минуту цихосци дата упокоєним Ксениї Саламуновей и Дюрови Лїкарови.

Тогорочне стретнуце отримане без школярох як то було по други роки, а акцент дати на наставнїкох и їх роботу. Наявене и шлїдуюце, 25. Стретнуце, хторе будзе отримане у Новим Орахове и Бачкей Тополї, и 26. хторому домашнї буду Петровци у сушедней Горватскей дзе ше тиж виучує руски язик.

Професор др Юлиян Рамач наставнїком подзелєл нєдавно видати „Словнїк народного руского язика”, а будзе послати и до Канади наставнїци Весни Фа хтора у Норт Бателфорду трима годзини руского язика.

Наставнїки руского язика подзелєни на порядну и виборну наставу потим отримали оддзелєни роботнї на хторих бешедовали о актуалних проблемох у своєй роботи, пречерали искуства, а мали на розполаганю и фахово викладаня професора Рамача.

Шицки учашнїки 24. Стретнуцох потим нащивели и Музейну збирку у школским будинку Замок и валалску Библиотеку, а стретнуце закончене з полудзенком у домашнєй Школи.

ПОВЯЗАНИ ТЕКСТИ