Катарина Сапун вибрана за школярку ґенерациї у Ґимназиї „Петро Кузмяк” у Руским Керестуре, у нєдавно законченим школским року, а була школярка оддзелєня на сербским наставним язику.
Катарина зоз Кули, Українка по националносци, а у Руским Керестуре закончела Ґимназию на сербским наставним язику и за штири роки школованя посцигла замерковани резултати хтори єй и оможлївели достац тото припознанє. Як гвари, цеши ше у нїм, бо зна кельо лєм труду и роботи уложела до ученя, дзекеди було и секираня, алє, як гвари, од того нє одступела и кед було чежко.
Зоз Катариновей школскей биоґрафиї школярки ґенерациї видзиме же попри одличного успиху хтори посциговала през шицки штири роки, була успишна и на рижних змаганьох, найвецей у першей и другей класи. Найчастейше то було зоз математики и физики, а тиж и з биолоґиї зоз хторих сциговала по окружни уровень дзе освойовала друге, або треце место. Ту и похвала за перше место на општинским змаганю з математики од Дружтва матетематичарох Сербиї и Министерства просвити. А ма Катарина и награду за друге место на Смотри кирилскей писменосци у Тителю 2014. року.
– През тоти роки школованя була сом заинтересована за математику, и други природни науки, алє през тото ше вше преплєтала и моя любов ґу уметносци и язиком. У природних наукох ми ше пачи тото же вони „кармя” мою любопитлївосц, док у уметносци єст простору за мрию и додумованє – толкує свойо прихильносци Катарина.
Питаме ше єй як є тераз задовольна з тим же вибрала присц до керестурскей Школи, зоз єй условиями, здобутим знаньом, професорами, товаришами, та яки памятки однєше з Керестура.
– Барз сом задовольна зоз шицким и шицким бим препоручела тоту школу, окреме тим цо су нєодлучни. Мнє особнє одвитовала робота у меншим оддзелєню, бо нас у моєй ґенерациї було лєм дзевецеро. Тото допринєсло же зме ше зблїжели и єдни з другима, и зоз професорами хтори тиж постали часц тей ширшей „фамелиї”. Поправдзе поведзено, тоти штири роки як кед би ми прелєцели, гоч як то звучи як фраза, а памятки и упечатки ище вше помишани и красни и жалосни, бо зме ше розишли – гвари Сапунова.
И Катарина ше опредзелєла за дальше школованє, та ше у медзичаше уписала на студиї на Високей технїчней школи фахових студийох у Новим Садзе дзе од септембра будзе студирац ґрафичне инженєрство и дизайн.
А тот вибор вироятнє вишол и зоз єй других интересованьох хтори наисце всестрани, як и сама гварела, од природних наукох по рижни файти уметносци. Катарина нам одкрила же у шлєбодним чаше „за свою душу” як ше то гвари, занїма ше и зоз аматерску фотоґрафию и знїманьом кратких филмох, попри тим же люби патриц филми и сериї. – У шлєбодним чаше занїмала сом ше и зоз рисованьом, писаньом, та ми даєдни роботи обявени и у школским часопису, а любим ше и вожиц на бициґли. Попри шицкого заинтересована сом и за психолоґию и астрономию, так же ми нїґда нє допито, бо вше дацо робим, лєбо виглєдуєм – заключела наша млада собешеднїца.
И з єй прикладу мож заключиц же общи напрям у Ґимназиї, яка и наша „Петро Кузмяк” у Руским Керестуре одвитує на широки интересованя школярох и їх знаня з найрижнороднєйших обласцох.
