КУЛА – На Вельконоцним вашаре у Кули свойо роботи виложели и активистки Здруженя женох „Идея“, а найвеку увагу прицагли писанки Паулини Такач з Кули, котра за писанє писанкох хаснує технїку з хтору успишно комбинує традицийни мустри з вишиваня и сучасни прикраски, як цо то циркони, джобки и рижни шнурки у фарбох.
Панї Такачова хаснує гуши и качи вайца, прето же им лупа твардейша, а од алату лєм клайбас, папер, ножнїчки, моцне лїпкаче и вельо прикраски. Як гварела Такачова, вайцо перше треба видуц, вивариц, а потим вимерац, же би кажди елемент бул на одвитуюцим месце.
– Нїґда нє знам же як даєдна писанка будзе випатрац, то придзе саме од себе. Перше залїпим пантлїки у фарбох и одредзим часци за лїпенє цирконох, а вец помали, з роботу, доставам идеї и инспирацию – гварела Такачова.
Тота вредна пензионерка дотераз за писанє писанкох хасновала велї технїки, а тей Велькей ноци ше найвецей занїмала зоз спомнутим прикрашованьом, бо, як гварела, тераз ю воно найвецей инспирує и релаксує.