ВЕРБАС – Вовторок, 9. мая, у Вербаше отримана схадзка Орґанизацийного одбору Хорского фестивалу „Карпати“, на хторей утвердзени учашнїки и пропозициї наступох, а найвецей бешедоване о почежкосцох з финансиями, понеже дотераз на рахунок орґанизатора, КПД „Карпати”, за Фестивал ище нє сцигли нїяки средства.
Предсидатель Дружтва Деян Загорянски на схадзки гварел же средства обецани од Националного совиту Руснацох и вербаскей локалней самоуправи, алє тераз досц чежко орґанизовац таки числени фестивал без пенєжу на рахунку.
Понеже ше того року обчекує до 200 учашнїкох, єдна з найвекших ставкох у буджету Фестивалу будзе репрезентация за госцох, та о єй обсягу и можлївосцох найвецей бешедоване на схадзи Орґанизацийного одбору.
Хорски фестивал „Карпати“ будзе 20. мая (собота), а наступя нашо хори: Хор Дому култури Руски Керестур и Катедралней церкви св. о. Миколая з Руского Керестура, Хор „Гармония“ з Нового Саду, Хор „Розанов“ з Дюрдьова и домашнї хор КПД „Карпати“ з Вербасу.
Госци Хорского фестивалу буду Мишани хор „Бачки шпиваче“ Културного центру Вербас, як и музични ансамбли з Києва и Львова з України, хтори у тот час буду у Сербиї з нагоди „Дньох українскей култури“ у Новим Садзе.
По пропозицийох Фестивалу, наступ єдного хору, лєбо ґрупи, нє шме буц длугши од 15 минути, а шицки маю обовязку шпивац духовни и народни композициї.