Чарни бобки пестовани на орґански способ

автор мар
1.2k Опатрене

Бобки арониї штреднє чежки коло 1 ґрам, та же би ше наоберало єден килограм треба дакус вецей труду як кед обераме вишнї, а зоз обераньом паприґи анї нє мож поровнац. Арония богата зоз витаминами А, Ц, Е и П, попри тим у своїм составе ма флаваноиди, антоцияни и биофеноли, та и танин пре котри ше морщиме кед єме тоту овоц

Дипломовани инжинєр технолоґ Мария Дюрич жиє и роби у Новим Садзе у своїм фаху, алє на валалє з помоцу родичох пестує аронию и прави продукти з нєй. Аронию у Руским Керестуре посадзели пред штирома роками, о рок звекшали поверхносци, а источашнє ше намагала направиц власни продукт, под своїм меном, на котри будзе пишна и за чий квалитет годна ґарантовац.

Приоритет єй була здрава, односно орґанска продукция, а идея настала од того кед єй дохтор препоручел же би пременєла способ живота и же би ше почала здравше костирац. Дзекуюци свойому фаху знала зоз чим ше стретаме у продуктох котри купуєме.

Преробки полни з конзервансами, а овоц и желєнява часто третировани зоз забранєнима препаратами, або зоз їх вельо векшим количеством, та єст и таки случаї же без огляду на „каренцу”, вони ше обераю и пласую до предавальньох.

– После власних виглєдованьох и намаганьох ґу здравому стилу живота, пред даскельома роками сом дознала за аронию. Мушим припознац же сом теди з помоцу арониї подзвигла имунитет, алє барз ми було чежко кед сом ю єдла швижу, та сом ю хасновала у рижних овоцових шалатох зоз дюмбиром и медом. Швидко ше родзела и идея о „Маровим шпайзу” – бренду котри промовуєме. Вихасновала сом искуство технолоґа, а зоз потримовку фамелиї, оца Стеви и мацери Нади зме посадзели перши младнїки арониї – толковала Мария.

Скорей як посадзели, мешацами вєдно зоз супругом виглєдовала яку файту посадзиц, а зоз оцом през викенд у загради читали литературу о орґанскей продукциї. Як гварела, нє знали вельо о орґанскей продукциї, алє мали искуства у конвенционалней заградкарскей продукциї у завартим просторе, цо им дакус помогло.

Нєискуство у тей обласци их лєм одшмелєло за дальшу роботу. Нєодлуга направели хладзальню и погон за продукцию маджунох у родичох на валалє.

ПЕЛИН, ПОКРИВА И ЗЕОЛИТ ЗА ЗАЩИТУ

Оцец тот котри задлужени же би керестурска арония була у полней „кондициї”. Вон провадзи чкодлївцох и евентуални пременки на рошлїни, поряднє коши младу покриву котру у гордовох пририхтує за пирсканє.

– Наша арония наисце нє видзела нїяки отрови, у защити нє хаснуєме аж анї препарати на бази бакру котри дошлєбодзени у орґанскей продукциї, успишно ше знаходзиме и без того – гварел оцец Стево.

– Вимага вельо бриґи, а цалком иншак пестовац аронию у Войводини и у брещковитих предїлох. Ми ту маме нєвигодну ситуацию коло того же ше вода затримує длужей, маме частейши випарйованя, а з тим и условия за хороти. Но, то шицко удатно ришуєме зоз природнима препаратами як цо то пелин, зеолит, покрива, з котрей пририхтуєме змишанїну за пирсканє.

ОЧЕКУЮ УРОЖАЙ 7 ДО 8 ТОНИ

Стево констатовал же зоз 840 древкох котри посадзени у двох заградох у валалє обчекую урожай од 7 до 8 тони. Тиж, наглашел же им прешлого року каменєц направел вельку чкоду, а пошлїдки у зменшаню рода годно обачиц ище того року, понеже каменєц нє лєм же поотлукал бобки, алє и младнїки котри требали буц родни тей сезони.

Арония нє церпи нїяки коровча, поряднє ю плєю и окопую. Як нам потолковала мац Нада, вона задлужена же би арония була без коровча, цо наисце чежко.

– Медзи шорами арониї нєт вельо места, а з оглядом же є велька, анї нє мож ходзиц и копац коло нєй з мотику. Шицке коровче плєєме на колєнох и зоз вельку осторожносцу же би ше нє ламало родни ґранча – виприповедала Нада.

НА СЕРТИФИКАТ ШЕ ЧЕКА НАЙМЕНЄЙ ТРИ РОКИ

Мария зоз фамелию ше опредзелєла за продукцию здравей поживи, на орґански способ, прето хасную шицки еколоґийни препарати. Сертификат о орґанскей продукциї ище нє пробовали достац, алє гваря же им и то у плану. Правда, то процес котри тирва найменєй три роки, а потребне сполнїц и велї условия.

– Пестованє арониї вимага вельо труду и усиловносци. Наша штиророчна плантажа уж висока коло 150 цм, тераз є у фази формованя бобкох котри би требало оберац штредком авґуста, алє шицко указує же веґетация попонагляла, та же оберачка годна почац можебуц и скорей – толкує оцец Стево, та додава же им чежше найсц и роботнїкох, понеже теди почина и оберачка паприґи, алє же ище вше нашли потребне число.

ПРОДУКЦИЯ НА ВАЛАЛЄ, А ПРОМОЦИЇ И У НОВИМ САДЗЕ

Мария вєдно зоз мацеру водзи бриґу коло преробку, а зоз супругом орґанизує промоциї по Новим Садзе и глєда дистрибутерох за єй продукт.

– Процес продукциї почина после дозреваня бобкох, лєм технолоґийно дозрети бобки мож хасновац у дальшим преробку. Мац задлужена же би аронию умила у трох водох, а дзекуюци тому же є таки перфекциониста, з води вибера и бобки котри нє задоволюю високи критериюми першей класи за продукцию – толкує технолоґ Мария.

Потераз понукаю штири файти маджунох, спомедзи котрих єден без билого цукру, а у плану им од тей сезони почац правиц и сок без конзервансу.

– Маджуни правиме на традицийни способ, без адитивох, конзервансу, фарбох и желатину. Маджун готови теди кед ше цукер у нїм карамелизує, аж теди ма свой совершени смак. Продукуєме маджун од арониї зоз додатком других овоцох, так же маме аронию зоз вишню, грушку, ягоду и малину. Понукаме и маджун з арониї и малини зоз додатком фруктози, цо значи же го можу єсц особи котри нє єдза били цукер – гварела Мария.

Свойо продукти рекламує на фейсбук мрежи, орґанизує промоциї по Новим Садзе у предавальньох здравей поживи, на пияцох, а кед ше єй уда та нащиви и даєдну манифестацию за промоцию подобних продуктох.

АРОНИЯ ЯК ЄДЗЕНЄ И ЛЇК

Як толкує наша собешеднїца Мария Дюрич, фаховци препоручую аронию и як єдзенє и як лїк. Полна є зоз антиоксидансами, прецо ма и антиканцероґене дїйство, позитивно дїйствує на шерцо и кревову систему, детоксикує наш орґанизем и моцнї имунитет, а мож ю єсц як сирову, алє и у преробкох, як цо то маджуни и соки котри у планє продукциї.

ПОВЯЗАНИ ТЕКСТИ